Ако планирате летен одмор со бебе или мали деца, изборот на дестинација игра клучна улога во пријатното искуство за целото семејство. Иако Грција е една од најпопуларните туристички дестинации во Европа, некои места не се најпогодни за семејства со деца, особено оние кои се познати по бурен ноќен живот и недостаток на детски содржини.
Според туристичките агенти на „Грчка инфо“, неколку дестинации треба да се избегнуваат ако патувате со најмладите членови на семејството. Места како Кавос на Крф, Малија на Крит, Лаганас на Закинтос и Кардамена на Кос се познати по забавите за млади, каде што алкохолот и музиката траат цела ноќ, а понудата на сместување и активности не е прилагодена за семејства со деца.
Исто така, Миконос не се препорачува за одмор со деца поради неговиот силен ноќен живот кој трае до доцна во ноќта. Покрај тоа, популарните дестинации како Санторини и Крит, иако се со фасцинантни плажи и култура, знаат да бидат пренатрупани во текот на летната сезона, а многу од активностите таму вклучуваат тури и екскурзии кои можат да бидат напорни за мали деца.
Дополнително, помалку познати острови со слаба инфраструктура или ограничен број ресторани, плажи со пристап за колички или детски активности, исто така не се идеални за семеен одмор.
Ако сакате релаксиран и безбеден летен одмор со вашите најмили, експертите советуваат внимателно да ги истражите можностите, да изберете сместување со добра локација и удобности за деца, како и дестинација каде приоритет е семејната атмосфера.
