Бакарот станува еден од најважните ресурси за енергетската транзиција, а европските држави забрзано инвестираат во негово производство. Полската компанија „KGHM“ објави инвестициски циклус вреден 8,55 милијарди долари до 2030 година, со кој ќе го зголеми производството и ќе ја зацврсти својата позиција на глобалниот пазар.
Во Македонија, иако постои проект со потенцијал да донесе инвестиција од 350 милиони евра, неговата реализација сè уште не започнува. Проектот Иловица-Штука, според најавите, би генерирал над 180 милиони евра годишен приход, би придонел за раст на БДП од околу 3% и би го зголемил македонскиот извоз за околу 4%, но засега останува неискористена можност.
Засега единствен активен рудник за бакар е „Бучим-Боров дол“, кој ги исцрпува своите капацитети, а претходно нереализирани остануваа повеќе инвестиции, меѓу кои и за рудници за бакар на Кожуф и во Казандол.
Инаку, амбициозните планови во Полска предвидуваат и KGHM да обезбеди снабдување со руда поблиску до своите полски топилници и да ги намали трошоците за логистика. Компанијата очекува околу 80% од производството на бакар да доаѓа од домашни ресурси, а остатокот од рудници во странство.
„По 2035 година, сакаме KGHM да биде модерна индустриска групација за повеќе суровини“, изјави извршниот директор Ремигиуш Пашкевич, додавајќи дека компанијата планира да изгради нов рудник наречен „KGHM 2.0“ во Полска.
Новата Стратегија, исто така, става нов акцент на операциите во странство. Од KGHM изјавија дека речиси 80% од планираните инвестиции ќе одат во нејзиниот основен бизнис во земјата, но остатокот ќе биде наменет за инвестиции во Чиле, САД и Канада. Се очекува да бидат потпомогнати рудникот „Сиера Горда“ во Чиле, во кој KGHM поседува 55% удел, и рудникот „Робинсон“ во Невада.
„Сакаме позицијата на нашите средства во странство да расте, бидејќи тоа го гради глобалниот кредибилитет на компанијата и отпорноста на структурните промени“, рече заменик-извршната директорка Ана Собиерај-Козакиевич.
Претходно Европската Унија утврди над 47 стратешки проекти на тлото на Унијата, односно голем број рудници, во 13 земји-членки: Белгија, Франција, Италија, Германија, Шпанија, Естонија, Чешка, Грција, Шведска, Финска, Португалија, Полска и Романија, за ископ на критични минерални суровини и за нив се предвидени забрзани процедури за дозволи. Забрзана процедура е предвидена и во нацрт законот кај нас, а од критичните минерали по кои трага ЕУ, Македонија може да се пофали со бакар, никел, антимон и други.
