Денеска во саудиската престолнина Ријад се слушнале неколку експлозии, а голем облак од црн чад и пламен се појавил во близина на Меѓународниот аеродром „Крал Калид“. Инцидентот се случил само неколку часа откако саудиските власти ги предупредиле жителите на главниот град за можна закана од воздух.
На местото интервенирале пожарникари кои гаснеле опожарен резервоар за гориво со логото на саудискиот нафтен гигант „Арамко“. Од просторот за складирање гориво во близина на аеродромот се издигал густ црн чад, а бил забележан и пламен.
Саудиските власти засега не ја соопштија причината за пожарот, ниту официјално го поврзаа инцидентот со можен напад на јеменските бунтовници Хути.
Поради случувањата, на аеродромот „Крал Калид“ се регистрирани големи доцнења и откажувања на летови. Во текот на денот аеродромот беше на највисокото ниво на индексот за нарушувања на воздушниот сообраќај, што укажува на сериозни проблеми со бројни доцнења и откажани летови.
Сведоци изјавиле дека слушнале неколку експлозии по издавањето на предупредувањето за воздушна закана, а жители забележале црн чад и оган во правец на аеродромот.
Саудиската служба за цивилна заштита претходно ги предупреди жителите на Ријад дека областа е изложена на „непријателска воздушна закана“ и ги повика да останат во затворени простории. Подоцна беше соопштено дека опасноста поминала.
Станува збор за прво вакво предупредување во саудиската престолнина откако во последните месеци повторно се разгореа судирите со Хутите во соседен Јемен.
Во последните недели Хутите извршија серија напади со беспилотни летала и ракети врз Саудиска Арабија. Во четвртокот едно лице загина, а две беа повредени откако остатоци од пресретнато беспилотно летало паднале во областа Таиф.
Тензиите дополнително се зголемија по напредувањето на Хутите долж јеменскиот брег на Црвеното Море и заземањето на стратешката пристанишна област Мока и островот Перим во теснецот Баб ел-Мандеб, еден од клучните поморски патишта во светот.
Саудиска Арабија ја поддржува меѓународно признатата влада на Јемен и во последните денови изврши повеќе воздушни напади врз позиции на Хутите.
Воениот портпарол на Хутите, Јахја Сари, вчера тврдеше дека Саудиска Арабија извршила околу 300 напади врз Јемен во текот на изминатата недела и предупреди дека нападите нема да останат без одговор.
Засега нема официјална потврда дека денешните експлозии и пожарот во близина на аеродромот во Ријад биле резултат на напад на Хутите.
