Независниот синдикат на професионални војници упати остри критики кон министерот за одбрана Владо Мисајловски, обвинувајќи го за неисполнети ветувања, манипулации и одолговлекување на решавањето на статусот на професионалните војници по навршувањето на 45-годишна возраст. Синдикатот најавува протест пред Владата на 7 ноември, со почеток во 11 часот, поради, како што тврди, долгогодишното незадоволство од состојбите во Армијата.
Во реакцијата потпишана од претседателот на синдикатот, Александар Насковски, се наведува дека последната изјава на министерот Мисајловски, со која најавил решавање на статусот на професионалните војници и зголемување на платите од 1 јануари, претставува уште едно во низата ветувања кои, според синдикатот, со месеци остануваат неисполнети.
„Денешната изјава, наводно спонтана, на министерот за одбрана Владо Мисајловски е класична лага и манипулација на јавноста, на професионалните војници и на припадниците на Армијата“, се наведува во соопштението.
Од синдикатот тврдат дека министерот меѓу припадниците на Армијата го добил прекарот „ЌЕ“, алудирајќи на постојаните најави за подобрување на условите кои, како што велат, не се реализираат.
Особено остри се критиките за најавеното зголемување на платите од 1 јануари, при што синдикатот прашува зошто тоа не се случи порано.
„Зошто од 1 јануари? Зошто не од утре поголеми плати? Иако знаеме дека цели три години платата не е зголемена ниту денар!“, прашуваат од синдикатот.
Тие бараат одговор и зошто статусот на професионалните војници по навршувањето на 45 години не бил решен во 2024 или 2025 година, ниту до денес, 16 октомври 2026 година.
Според Насковски, актуелното раководство на Министерството за одбрана веќе две и пол години не успева да обезбеди конкретни подобрувања на правата и примањата на армискиот персонал.
Синдикатот оценува дека најновите ветувања на министерот се директно поврзани со најавениот протест на припадниците на Армијата и поранешните пензионирани припадници, кој, како што посочуваат, бил најавен уште пред една недела.
„Паниката и стравот од незадоволството на припадниците на една НАТО членка предизвика брза реакција на министерот со јавно искажување на веќе познати ветувања кои никогаш не се реализираат, туку секогаш имаат препознатлив предзнак ЌЕ“, се наведува во реакцијата.
Од Независниот синдикат на професионални војници најавуваат дека протестот ќе се одржи на 7 ноември 2026 година, во 11 часот, пред Владата, а како главни причини ги посочуваат незадоволството од платите, нерешениот статус на професионалните војници и односот на надлежните институции кон нивните барања.
Насковски во соопштението тврди дека ова ќе биде прв протест на припадници на Армијата на земја членка на НАТО, иако за таквото тврдење не се приложени дополнителни податоци.
Синдикатот порачува дека незадоволството е големо и дека повеќе нема простор за нови ветувања без конкретни резултати.
Во доставеното соопштение не е содржан став од Министерството за одбрана во однос на обвинувањата.
