Skip to main content
Македонија

Нула жртви за 17 години: Како Црвениот крст ги спасува бездомниците во најстудените ноќи во Скопје

22/12/2025  09:48

Во Центарот за дневен престој на бездомни лица при Црвениот крст на град Скопје функционира и стационарен дел привремено прифатилиште, кое веќе 17 години обезбедува сигурно засолниште за најранливите категории граѓани. Во рамките на овој центар делува и мобилен тим кој, особено во периоди на екстремно ниски температури, работи 24 часа дневно.

Мобилниот тим секојдневно излегува на терен и врши проценки на бездомни лица кои имаат потреба од преноќување, топол оброк и средства за лична хигиена, особено за време на студените денови што го зафаќаат Скопје. Во патролното возило постојано има спални кебиња, вреќи за спиење, комплети со капи, шалови и ракавици, како и топли напитоци и храна.

Овој пристап е особено значаен бидејќи дел од бездомните лица, од лични причини, одбиваат да дојдат во стационарниот дел на центарот. Токму затоа мобилниот тим е секогаш подготвен директно на скопските улици да им ја достави неопходната помош и поддршка.

„Можам да се пофалам со нула смртност од отворањето на центарот“, изјави за 24инфо Драгана Лазаревска, раководител на пунктот за бездомници при Црвениот крст на град Скопје.