Skip to main content
Скопје

Michel Rojkind: Под водство на Османи, Чаир може да стане модел за урбана трансформација

19/08/2025  17:06

Мексиканскиот архитект со светска слава, Michel Rojkind, кој е дел од тимот на кандидатот за градоначалник Бујар Османи, вели дека Чаир е жив систем што треба да се развива со грижа, почит и вклученост.

Тој најави дека заедно со архитектонските студија SON и UNO, ќе работи на модели што не се базираат само на инфраструктура, туку и на културната, просторната и социјалната интелигенција која веќе постои во Чаир. „Нашата работа ќе биде втемелена во ритмите на Старата чаршија, во заедницата и ќе се базира на секојдневните начини на кои луѓето живеат и го користат јавниот простор“, додаде тој.

Според него, Чаир не е само географска точка на мапата, туку симбол на коегзистенција и континуитет. Затоа визијата што ја гради со Османи се стреми да создаде средини каде различноста не само што се прифаќа, туку се поврзува, каде луѓето се чувствуваат „видени, ценети и како дома, без оглед на нивното потекло“.

Во својата изјава, Rojkind посочи и дека во основата на овој концепт ќе биде грижата едни за други и вклученоста на граѓаните во носењето одлуки. „Под водство на Бујар Османи, уверени сме дека овој проект може да стане модел за регенерирање на урбаниот живот, а воедно да се почитуваат различноста, достоинството и припадноста“, заклучи тој.
Изјавата доаѓа само еден ден по прошетката на Османи и Rojkind низ Старата скопска чаршија, каде двајцата симболично го почнаа процесот на ко-креирање на урбана визија за Чаир. Османи тогаш најави дека за првпат, општината ќе добие долгорочен и сеопфатен план за развој, кој во фокусот ќе ги стави потребите на граѓаните, безбедноста, пристапноста и јавниот простор.

„На Чаир не смее повеќе да се гледа како на симбол за хаос и нефункционалност. За мене Чаир е мојот дом, и како иден градоначалник ќе вложам секој атом енергија да го издигнеме од пепелта“, изјави тогаш Османи.