Утрото по катастрофалниот пожар што го зафати подрачјето околу Омиш и Сплит откри сцени на пустош – изгорени автомобили, уништени куќи, опожарени бродови и огромна материјална штета. Во огнената стихија загина едно лице, а 42 лица се повредени. Осуммина од нив се во критична состојба и се борат за живот на респиратор.
Сплитската полиција го пронашла телото на починатата жена на локацијата Мала Лука. Според првичните неофицијални информации, станува збор за туристичка работничка од Босна и Херцеговина, која заедно со своите колешки се обидувала да побегне од огнената стихија.
„Сликите беа застрашувачки. Луѓето се обидуваа да спасат што може да се спаси, но ветерот брзо ја менуваше насоката. Направена е огромна материјална штета“, раскажуваат локалните жители.
Драматична ноќ имале и лекарските екипи во Клиничкиот центар во Сплит. Поради сериозноста на изгорениците, четири лица итно биле префрлени на понатамошно лекување во Загреб, меѓу кои и една малолетничка. Меѓу повредените има и двајца странски државјани кои, според информациите, се здобиле со полесни повреди.
Пожарот се ширел со огромна брзина, а огнениот фронт во одредени моменти се протегал и до десет километри. Силниот ветер дополнително ја отежнувал борбата со пламените јазици, кои за кратко време се приближувале до куќи, апартмани и туристички објекти.
Семејства и туристи сведочат за драматични моменти и бегство во последен момент.
„Бевме во куќата и разговаравме за пожарот. Во една секунда огнот стигна до нас и сè изгоре“, раскажал чешки турист.
Сопствениците на апартмани во погоденото подрачје брзо ги евакуирале своите гости, додека дел од локалните жители со сопствени бродови во текот на ноќта помагале во извлекувањето и превезувањето на деца, постари лица и туристи на безбедни локации.
Размерите на материјалната штета станале целосно видливи со разденувањето. Изгорени возила останале на патиштата, дел од куќите и помошните објекти се уништени, а огнот зафатил и бродови.
Влечните служби веќе отстраниле десетици опожарени автомобили за да овозможат расчистување и нормализирање на сообраќајот. Истовремено, надлежните служби и обвинителството вршат увид на опожарените површини и ги утврдуваат околностите под кои избувнал и се проширил пожарот.
По една од најтешките ноќи за ова подрачје, фокусот останува на повредените кои се во критична состојба, додека на терен продолжува проценката на штетата.
