Жестоки судири меѓу демонстрантите и полицијата ја одбележаа денешната протестна акција во главниот град на Албанија, Тирана, каде што стотици студенти и граѓани излегоа на улиците барајќи подобри услови за образование, системски промени и оставка од премиерот Еди Рама.
Протестите ескалираа во близина на зградата на албанското Министерство за образование, каде што полицијата интервенираше со водни топови и солзавец во обид да ги растера собраните граѓани.
И покрај полициската интервенција, демонстрантите не се повлекоа целосно, туку повторно се прегрупираа на улицата „Драч“, во непосредна близина на Министерството, продолжувајќи со антивладините скандирања и барањата за оставка на владата.
Тензиите започнале кога дел од демонстрантите фрлале јајца, камења, петарди и други предмети кон зградата на Министерството за образование. Во инцидентите биле искршени прозорци и оштетена заштитната ограда на објектот.
Полицијата потоа употребила водни топови за растерување на толпата, а на терен биле распоредени и дополнителни полициски единици.
Според албанските медиуми, во текот на интервенцијата дошло до физички пресметки меѓу дел од демонстрантите и полициските службеници, додека неколку лица биле приведени. Првичните информации не даваат конечна официјална бројка на приведените.
На социјалните мрежи се појавија и видеоснимки на кои се гледаат тензични сцени од полициската интервенција, вклучително и демонстранти кои полицајците ги отстрануваат со употреба на сила.
Незадоволството на студентите е поврзано со условите за студирање, високите трошоци за образование и ограничените можности за вработување по завршувањето на студиите.
Дел од демонстрантите упатија и директни политички пораки против владата, барајќи оставка од премиерот Еди Рама и промени во начинот на управување со државата.
Полициската интервенција предизвика остри реакции од претставниците на албанската опозиција.
Лидерот на Демократската партија, Сали Бериша, ја осуди употребата на сила против студентите, обвинувајќи ја полицијата за насилство.
„Стоп на теророт на нарко-државните бандити врз храбрите студенти“, порача Бериша преку социјалните мрежи.
Тој изрази поддршка за демонстрантите, додека и други претставници на опозицијата побараа прекин на полициската интервенција против студентите.
Протестите продолжија и во попладневните и вечерните часови, при што демонстрантите повторно се собраа во близина на Министерството за образование.
Според информациите објавени во текот на вечерта, дел од демонстрантите запалиле и оган на улицата, додека полициските сили останале распоредени во поширокиот простор околу Министерството.
Ситуацијата во Тирана останува тензична, а студентските протести прераснаа во поширок израз на незадоволство од состојбите во образованието и политиките на албанската влада.
