Skip to main content
Македонија

Гаши на средба до набљудувачите од ЕП: Уверен сум дека изборите ќе покажат демократска зрелост на земјата

17/10/2025  17:44

Претседателот на Собранието Африм Гаши денеска оствари средба со делегација на пратеници, кои во име на Европскиот парламент ќе ги набљудуваат локалните избори.

Претседателот Гаши на средбата изразил уверување дека претстојните локални избори ќе бидат спроведени во целосна согласност со највисоките демократски стандарди и ќе ја покажат демократската зрелост на земјата. Тој ја поздравил долгата и успешна соработка како и редовната комуникација со Европскиот парламент, која најдиректно се одвива преку Мешовитиот парламентарен комитет ЕУ- Северна Македонија. Нагласил дека и после 20 години од кандидатскиот статус, реформи, компромиси и тешки и болни одлуки, граѓаните на земјава остануваат верни на европските вредности.

Европратениците информирале дека како делегација се дел од меѓународната набљудувачка мисија предводена од ОБСЕ-ОДИХР и дека иако досега учествувале во набљудувањето избори во земјата многу пати, првпат ќе следат локални избори. Нивната цел е да придонесат кон непристрасно и објективно мониторирање на процесот, но и да ја потврдат силната поддршка на Северна Македонија на нејзиниот пат кон ЕУ.