Срамно е што американската влада го игнорира налогот на Меѓународниот кривичен суд (МКС) за апсење на израелскиот премиер Бенјамин Нетанјаху, кој е во Њујорк за Генералното собрание на Обединетите нации, а не им издаваат визи на палестинските претставници за да присуствуваат на сесијата, соопшти „Амнести интернешнл“ (АИ).
– Речиси две години откако МКС издаде налог за апсење на Нетанјаху, неказнивоста продолжува да преовладува, а Палестинците ја плаќаат цената, објави АИ на платформата Икс.
МКС издаде налог за апсење на Нетанјаху поради наводни воени злосторства и злосторства против човештвото во Појасот Газа.
АИ оцени дека Израел го продолжува геноцидот врз Палестинците во Појасот Газа, врши етничко чистење во Западен Брег, незаконска окупација и воведува систем на апартхејд.
– Континуираното поткопување на МКС испраќа остра порака до сите жртви на меѓународни злосторства дека правдата останува недостижна, додека САД и другите моќни држави намерно ја поткопуваат универзалната вредност на меѓународното право, посочи АИ.
Организацијата за заштита на човековите права ја обвини Франција за двојни стандарди, затоа што дозволила прелет на авионот на Нетанјаху кон Њујорк, додека претседателот Емануел Макрон повика на почитување на меѓународното право.
– Не придонесува ли Франција за неказнивоста, дозволувајќи му пристап на својата територија на израелскиот премиер, кој се бара за злосторства против човештвото, истакна АИ.
