Бегството на Ива Михајлова од Македонија, и покрај изречените судски мерки, отвори сериозни прашања за функционирањето на институциите, контролата на државната граница и можната логистичка поддршка што ја имала при напуштањето на земјата.
Универзитетската професорка по криминалистика, проф. д-р Марина Малиш Саздовска, во гостување во емисијата „Ноќно студио“ на „4ТВ“ посочи дека постојат индикации оти во семејството е применет ист или сличен начин на постапување, имајќи предвид дека претходно и таткото на Михајлова ја напуштил државата за да избегне соочување со правдата.
Според професорката, фактот што во официјалната евиденција на граничната полиција нема регистрирано излез на Михајлова упатува на можноста таа нелегално да ја преминала државната граница.
„Граничната полиција има обврска строго да го контролира излезот на домашните државјани, пред сѐ за да се провери дали за нив има изречено мерки за забрана за напуштање на земјата. Во овој случај, со оглед на тоа што лицето веќе имало изречени мерки, а нема потврда дека преминало на официјален граничен премин, извесно е дека се работи за илегален премин“, објасни Малиш Саздовска.
Таа оцени дека не може да се исклучи можноста Михајлова да го искористила искуството или логистичката поддршка на својот татко, кој претходно ја напуштил државата.
Според неа, кога член на семејството веќе успеал да избега во странство, постои можност да обезбеди информации, контакти или друга помош за организирање слично бегство. Сепак, евентуалната вмешаност на други лица треба да биде предмет на истрага.
Професорката се осврна и на прашањето дали судот требало да определи притвор наместо поблаги мерки на претпазливост, особено со оглед на околностите поврзани со претходното бегство на таткото.
Таа нагласи дека одлуките за определување притвор се во надлежност на судот и се носат врз основа на законските услови и проценката на ризиците во конкретниот случај.
Малиш Саздовска потсети и на принципот на презумпција на невиност, но истовремено укажа дека при одлучувањето за мерките за обезбедување присуство мора внимателно да се проценат сите околности што можат да укажуваат на опасност од бегство.
Бегството на Михајлова повторно го отвора прашањето дали надлежните институции навремено ги препознале ризиците и дали преземените мерки биле доволни за да се спречи нејзиното напуштање на земјата.
Во однос на најавените проверки за евентуални пропусти на полициските службеници, професорката истакна дека е неопходно детално да се испитаат сите околности под кои Михајлова ја напуштила Македонија.
Според неа, само со целосна истрага може да се утврди дали бегството било организирано со помош на други лица, на кој начин била премината границата и дали постои евентуална институционална одговорност.
