Поранешниот министер за култура и туризам Зоран Љутков нема да се врати на актерската работа во својот матичен Драмски театар во Скопје, туку го продолжува ангажманот во државната администрација. Тој е назначен за национален координатор за култура во Владата.
Информацијата денеска ја објавија повеќе медиуми, а името на Љутков веќе јавно се споменува во ова својство и во реакциите поврзани со „Струшките вечери на поезијата“.
Љутков ја извршуваше функцијата министер за култура и туризам од формирањето на Владата во 2024 година, а министерската фотелја ја напушти во рамки на реконструкцијата на владиниот состав.
На негово место беше избран дотогашниот заменик-министер Седат Сулејмани. Официјалното примопредавање на функцијата беше извршено на 15 јули, кога Сулејмани ја презеде должноста министер за култура и туризам.
Иако по заминувањето од министерската позиција постоеше можност Љутков да се врати во Драмскиот театар, каде што е неговото матично работно место како актер, со новиот ангажман тој останува во институционалниот систем и продолжува да работи во областа на културата.
Овојпат неговата улога е национален координатор за култура во Владата, позиција од која се очекува да биде вклучен во координацијата на прашања и активности поврзани со културниот сектор.
Сепак, на официјалната веб-страница на Владата, во делот посветен на националните координатори што е достапен во моментот на објавувањето, името на Љутков се уште не е наведено. Тоа укажува дека страницата сè уште не е ажурирана со неговото ново назначување.
