Мајами ги шокираше водечките носители во севкупниот плеј-оф победувајќи ги со 128-126 по продолжение, иако се чинеше дека Бакс ќе победат барем во шестиот натпревар. Имено, имаа 16 поени предност со влегувањето во последната четвртина, како и 118:116 на половина секунда пред крајот за Џими Батлер да обезбеди продолженија.
Батлер беше незапирлив со 42 поени и 8 скока, Гејб Винсент постигна 22 поени, а Бам Адебајо забележа трипл-дабл со 20 поени, 10 скока и 10 асистенции. Поразените Бакс ги предводеше Јанис Антетокунмпо со 38 поени и 20 скока, додека Крис Мидлтон постигна 33 поени.
Во вториот синоќешен натпревар од Источната конференција, Њујорк славеше на гости кај Кливленд 106:95 и ја доби серијата со 4:1. Џејлен Брунсон постигна 23 поени, Реџеј Барет додаде 21, а Никс минаа една пречка во плејофот за прв пат од 2013 година.
На Западот, Мемфис убедливо победи на домашен терен против ЛА Лејкерс 116:99 и со тоа ја намали негативата во серијата на 3:2, додека Голден Стејт победи на гостувањето кај Сакраменто со 123:116 и така поведе со 3:2 во серијата откако губеа 0:2.
Дезмонд Бејн со 33 поени и 10 скока и Џа Морант со 31 поен, 10 скока и 7 асистенции го предводеа Мемфис до победата и продолжување на серијата која сега се враќа во Лос Анџелес. Најефикасен кај Лејкерси беше Ентони Дејвис со 31 поен и 19 скока, додека Остин Ривс постигна 17 поени.
Вориорс до славјето ги предводеше никој друг туку Стивен Кари со 31 поен и 8 асистенции. Клеј Томпсон постигна 25 поени, а Дрејмонд Грин постигна 21. Де’Арон Фокс ги предводеше шесте двоцифрени играчи на кралевите со 24 поени.
