Три месеци по загинувањето на 15 лица пред железничката станица во Нови Сад денеска во овој град ќе бидат одбележани со голем граѓански собир и блокада на три новосадски моста организирани од студенти.
На денешниот собир му претходеше пристигнувањето на голем број студенти од Белград кои пеш дојдоа во Нови Сад, каде со своите колеги и граѓани ќе им оддадат почит на жртвите.
И голем број граѓани на велосипеди дојдоа од Белград во главниот град на Војводина.
Нив синоќа ги пречекаа илјадници студенти и жители на Нови Сад, а на факултетите им беше овозможено импровизирано сместување, храна и логистичка поддршка.
Пристигнувањето и пречекот на демонстрантите во Нови Сада не беше проследен со сериозни инциденти, а поворките и собирот беа обезбедени од полицијата.
Од ноември минатата година досега стотици илјади луѓе излегоа на протести низ земјата, поттикнати од смртта на 15 лица при пад на настрешница, а студентите блокираа повеќе од 60 факултети, барајќи одговорност од властите, почитување за Уставот, законот, искоренување на корупцијата и зајакнување и независност на институциите без политичко влијание.
