
Д-р Димитар Ангелески е нов директор на Државниот санитарен и здравствен инспекторат (ДСЗИ). На функцијата го наследува досегашниот директор, д-р Кирил Лазов, соопшти Министерството за здравство.
Ангелески е специјалист ортопед. Работел во Службата за итна медицинска помош при Здравствениот дом – Скопје, а бил и директор на Медицинскиот симулациски центар.
На средбата со Ангелески, министерот за здравство Сашо Клековски рече дека очекува Инспекторатот да ја зајакне својата улога во заштитата на јавното здравје. Тој побара побрзо и повидливо постапување на инспекторите на терен, доследна примена на прописите и поголема отчетност и транспарентност во работата.
Клековски му се заблагодари на досегашниот директор Лазов за неговата работа и професионалниот ангажман.
Промената во ДСЗИ доаѓа три дена откако нови директори добија три универзитетски клиники во Скопје – Клиниката за гастроентерохепатологија, Клиниката за дигестивна хирургија и Клиниката за пластична и реконструктивна хирургија.

