На планината Голија, во близина на Ивањица во Србија, денеска падна првиот снег оваа сезона, јавуваат српските медиуми
Иако снегот паѓа со засилен интензитет, поради релативно високата температура засега не се задржува на почвата.
Жителите на планинските села велат дека снегулките веднаш се топат, но септемврискиот снег сепак привлекол внимание.
„Паѓа прилично силно, но снегулките веднаш се топат. Навикнати сме на долги и студени зими, но снегот во септември сепак е интересен“, велат жители на овој крај.
Голија е позната по променливите временски услови и долгите зими, поради што снежни врнежи повремено се појавуваат и надвор од зимската сезона. Меѓу жителите се прераскажува дека на планината низ годините бил забележан снег во речиси сите месеци, освен во јули.
До првите снегулки дојде по наглото заладување што зафати делови од Србија. Метеоролозите претходно прогнозираа снег на највисоките планини, каде што температурите се спуштија близу нулата.
Снежна покривка на Голија засега не е формирана, а според прогнозите, заладувањето ќе биде краткотрајно и во следните денови повторно се очекува пораст на температурите.
