Бројот на загинати во поплавите низ Југоисточна Азија во петок се искачи на најмалку 161, а властите во регионот се обидуваат да спасат заглавени луѓе, да ја обноват електричната енергија и телекомуникациите, како и да ги координираат спасувачките операции откако водата почна да се повлекува.
Големи делови од Индонезија, Малезија и Тајланд се погодени од еднонеделни обилни дождови и ретка тропска бура што се формираше во Малајскиот Проток.
Дополнителни 46 лица загинаа поради циклонот во Шри Ланка, соопштија властите.
На тешко погодениот индонезиски остров Суматра, до петок наутро е потврдено дека загинале 52 лица, изјави Абдул Мухари, портпарол на службата за управување со катастрофи.
Во регионот Паданг Парјаман на Суматра, каде вкупно починале 22 лица, жителите се соочиле со вода висока најмалку еден метар, а спасувачките екипи до петок сè уште не биле пристапиле до нив.
„Немаме повеќе основни намирници и храна“, изјави 40-годишниот жител Мухамад Раис, кој бил принуден во четвртокот да се пресели на кат од својот дом за да избега од наглото надоаѓање на водата.
Телекомуникацискиот систем не функционирал во некои делови од островот, а властите работеле на обновување на снабдувањето со електрична енергија и расчистување на патиштата блокирани од свлечишта.
Таиландската влада во соопштение информира дека 87 лица загинале во поплавите во осум јужни провинции. Според податоците, погодени се повеќе од 3,5 милиони луѓе.
Во Малезија, каде се потврдени две жртви, тропската бура Сенијар пристигна на копно околу полноќ и оттогаш ослабна. Метеоролошките служби најавија обилни дождови и силни ветрови и предупредија дека разбранетото море може да биде опасност за помали пловни објекти.
Вкупно 30.000 евакуирани лица се наоѓаат во привремени засолништа, што е помалку од четвртокот кога таму имаше 34.000 луѓе.
