Осумгодишното дете изгризано до смрт од куче во скопската населба Пинтија, во болница било однесено без знаци на живот. Љубен Арсенков, директор на Универзитетската клиника по хируршки болести „Св. Наум Охридски“ вели дека детето имало голема рана вратот и главина расекотина.
„Вчера попладне во 17.22 часот во нашата клиника беше донесено осумгодишно дете со сериозни повреди во пределот на главата и вратот нанесени од каснување на куче. Во моментот на прием детето е без знаци на живот со проширени зеници и без срцева акција. Веднаш е направена реанимациска постапка, но за жал без успех. Големата рана на вратот, каде што минуваат главните крвни садови, довела детето да искрвави“, вели Љубен Арсенков, директор на Универзитетската клиника по хируршки болести „Св Наум Охридски“ за „Макфакс“.
Телото на детето е предадено на обдукција.
Претходно, МВР соопшти дека кучето кое го нападнало детето било на сосед, кој живеел во близина.
„Од ГОБ ‘Св. Наум Охридски’, на 11.4.2023, во 18.25 часот, било пријавено дека кај нив бил донесен малолетник од Скопје, кој, според пријавеното, им подлегнал на повредите како последица од напад од куче, сопственост на неговиот сосед Н. Г.“, велат од МВР.
Според неофицијални информации, детето играјќи се, се префрлило преку оградата која ги дели со соседот и влегло во неговиот двор, во кој тој чувал куче од расата англиски бул мастиф, како и уште едно куче. Кога детето било нападнато од кучето во дворот немало никој. Сопственикот на кучињата го нашол детето како лежи во дворот од неговиот дом, а до него стоело кучето кое го нападнало. Тој веднаш ги повикал родителите и сите заедно го однеле во болница
