Во цела Франција синдикатите почнаа штрајк, кој се смета дека ќе биде еден од најголемите досега, а чија цел е да се принуди францускиот претседател, Емануел Макрон, да ја повлече најавената реформа на пензискиот систем.
Полицијата за разбивање на протестите пукаше со солзавец кон маскираните демонстранти, кои кон припадниците на органите на редот фрлаа со разни предмети.
Во Лион и Марсеј на улиците изегоа илјадници демонстранти, кои носеа транспаренти со натпис „Макрон се изгуби“ и „Не допирајте ги нашите пензии“, пренесува „Ројтерс“.
Во Монпелје во поворката учествуваа стотици адвокати во одори и негуватели во болничарски униформи, како и десетици „жолти елеци“.
Вкупно, речиси 285.000 лица денеска демонстрираат во 40-ина града во Франција, но оваа привремена процена не ги зема предвид демонстрациите во Лион и Париз, каде што поворката почна околу 15.15 часот.
Како резултат на штрајкот, сообраќајот во градовите е парализиран, без железнички, ниту метро-сообраќај, а на францускиот аеродром „Орли“ сообраќајот е намален 20 проценти.
Во пресрет на демонстрациите милиони работници се заканија дека ќе штрајкуваат во знак на протест поради тоа што ќе бидат принудени да се пензионираат подоцна или ќе се соочат со намалени пензии.
