Американската воена операција против јеменските Хути ги чинеше САД повеќе од милијарда долари, објави Ен-Би-Си, повикувајќи се на двајца американски функционери запознаени со трошоците.
Од 15 март, кога администрацијата на претседателот Доналд Трамп ја започна воената операција против јеменските Хути, позната како операција „Суров јавач“, Пентагон врз оваа група употреби околу 2.000 бомби и ракети во вредност од повеќе од 775 милиони долари.
Тука спаѓаат најмалку 75 „Томахавки“, со цена од околу 1,9 милиони долари секоја, најмалку 20 крстосувачки ракети AGM 158 лансирани од воздух по цена од околу 1,5 милиони долари по ракета….
САД, исто така, потрошија најмалку 10 милиони долари за преместување на најмалку два системи за воздушна одбрана „Патриот“ и воени материјали за одржување на системите во регионот преку бродови.
За време на сведочењето пред Конгресот минатиот месец, адмиралот Сем Папаро, кој ја предводи американската Индо-пацифичка команда, рече дека војската користела 73 летови на Ц-17 за да премести еден систем за воздушна одбрана „Патриот“ од својот регион на Блискиот Исток. Летот на Ц-17 чини околу 27.000 долари на час, а американската војска премести два системи „Патриот“ во регионот.
Откако Хутите почнаа да напаѓаат меѓународни бродови во Црвеното Море по нападот на Хамас врз Израел во 2023 година, администрацијата на Бајден започна кампања против Хутите за да помогне во враќањето на она што го нарекува „слобода на навигација“ – можноста бродовите да се движат без да бидат вознемирувани од непријателски сили. Сепак, тие операции малку направија за да ја деградираат групата, велат критичарите на пристапот на администрацијата на Бајден.
Во март, претставници на администрацијата на Трамп објавија дека ќе го зголемат притисокот врз групата.
Американскиот претседател Трамп пред неколку дена изјави дека Хутите „капитулирале“ пред САД и дека Вашингтон „веднаш“ ќе престане да ја бомбардира проиранската група.
