Вистинска драма се одвивала денеска на Шар Планина, во близина на македонско-косовската граница, откако двајца странски државјани кои планинареле кон врвот Пирибег биле затекнати од силно невреме, дожд и густа магла. По повеќечасовна координирана спасувачка акција меѓу македонските и косовските служби, двајцата планинари се пронајдени живи и во добра здравствена состојба.
Според информациите од Центарот за управување со кризи (ЦУК), пријавата за заглавените планинари била примена утрово во 08:22 часот, преку Единствениот број за итни повици 112.
Двајцата странски државјани, кои се движеле кон врвот Пирибег, поради наглото влошување на временските услови биле принудени да побараат засолниште во планинарски објект, лоциран на македонска територија, во непосредна близина на границата со Косово.
Ситуацијата дополнително ја отежнувале непристапниот планински терен и лошите временски услови. По извршените проверки било утврдено дека од македонска страна до објектот може да се пристапи единствено пеш, а за пристигнување до локацијата биле потребни повеќе од шест часа пешачење во еден правец.
Дополнителен проблем претставувале дождот и густата магла, поради кои било невозможно да се организира хеликоптерска интервенција од македонска страна.
Веднаш по добивањето на пријавата, Регионалниот центар за управување со кризи во Тетово ги активирал механизмите за координација и ги известил надлежните институции, меѓу кои Полициската станица Теарце, Центарот за итни случаи во Тетово и Дирекцијата за заштита и спасување.
Со оглед на тоа што од косовска страна постои пристапен пат од скијачкиот центар Брезовица до планинарскиот објект, било оценето дека најбезбедно и најбрзо решение е спасувачките екипи да пристапат од територијата на Косово.
По насоки на директорот на ЦУК, била воспоставена комуникација со ЈП „Национални шуми“ – подружница Тетово, а потоа и со надлежните служби од Косово. Во акцијата се вклучила и косовската Служба за пребарување и спасување во планина.
Во 11:45 часот, оперативниот центар на ЦУК успеал телефонски и преку СМС-пораки да воспостави директен контакт со едно од заглавените лица. Планинарите биле известени дека спасувачка екипа од Косово е ангажирана за нивно безбедно извлекување.
Во 14:21 часот, косовските спасувачи потврдиле дека се во постојана комуникација со двајцата странски државјани и дека тие се во добра здравствена состојба. Првично било најавено дека нивното извлекување се очекува околу 16 часот.
Конечно, во 16:50 часот, во Центарот за управување со кризи пристигнала информацијата дека спасувачката акција е успешна.
Двајцата планинари биле пронајдени во добра здравствена состојба и започнал нивниот транспорт кон Штрпце, во Република Косово.
Од ЦУК информираат дека во текот на целата интервенција била одржувана континуирана комуникација и координација меѓу надлежните служби од Македонија и Косово, со цел спасувањето да заврши безбедно.
Случајот уште еднаш покажува колку брзо временските услови на високите планински предели можат да станат опасни, особено кога дождот, маглата и тешко пристапниот терен го отежнуваат движењето и интервенцијата на спасувачките служби.
