Американската војска тврди дека целосно ја блокирала поморската трговија во и од Иран и дека поморската блокада продолжува да се спроведува против бродовите на сите земји што влегуваат или излегуваат од крајбрежните области или пристаништа на земјата. „Блокадата на иранските пристаништа е целосно спроведена“, објави Бред Купер, командант на Централната команда на САД (CENTCOM), синоќа на X.
Купер рече дека американските сили одржуваат поморска доминација на Блискиот Исток и целосно ја прекинале поморската трговија со Иран за помалку од 36 часа од почетокот на блокадата. Во посебна изјава, ЦЕНТКОМ рече дека уништувачи со наведувани ракети биле дел од операцијата.
„Блокадата се спроведува непристрасно против бродовите на сите нации што влегуваат или излегуваат од крајбрежните области или пристаништа на Иран“, додаде ЦЕНТКОМ. Американскиот претседател Доналд Трамп ја објави блокадата на Ормутскиот теснец по неуспешните разговори во Исламабад меѓу Вашингтон и Техеран за време на викендот.
Целта е да се спречи Иран да заработува пари од надоместоците за премин низ теснецот и да се намалат приходите од нафта. Американскиот потпретседател Џ.Д. Венс вчера на настан во државата Џорџија изјави дека се почитува прекинот на огнот меѓу САД и Иран и дека претседателот Доналд Трамп не сака само „мал договор“ со Техеран, туку „голем договор“.
Венс, исто така, рече дека САД и Иран постигнале „огромен напредок“ во разговорите во Пакистан минатиот викенд. „Но, причината зошто договорот сè уште не е постигнат е затоа што претседателот навистина сака договор во кој Иран нема нуклеарно оружје“, додаде американскиот потпретседател
