Соопштение на Левица:
Пратеничката Јована Мојсоска од Левица во денешното гостување на ТВ 24 во емисијата „Студио 10″ цитирајќи ги членовите од Деловникот на Собранието појасни дека нема никакви деловнички прекршувања и дека третиот обид на Левица за Надзорна расправа за трагедијата во Кочани беше конечно успешен, а обидот за блокада на пратениците од власта – неуспешен:
„Надзорна расправа за трагедијата во Кочани не требаше да се случи со барање на 15 пратеници или по Иницијатива на Левица, туку 120 пратеници требаше да застанат зад ова, бидејќи е од јавен интерес ниту еден да не биде амнестиран – дали од оваа или од претходната власт.” – кажа Мојсоска со жалење што останатите парламентарни партии веќе подолго време немале слух за ова прашање и дополни дека владејачката ВМРО-ДПМНЕ има тенденција да ја замре темата за Кочани бидејќи е евидентно дека нивни функционери или блиски имале удел во трагедијата.
„Сѐ уште има неодговорени прашања околу трагедијата, истрагата, водењето на постапката, како и здравствениот систем” – посочи таа по однос на нужноста за одржување на надзорна расправа.
„Помеѓу полициските службеници од последното апсење е и сменоводителот во ОВР Кочани, а два месеци наназад, на Интерпелацијата за министерот Тошковски, кога истакнав дека е амнестиран од одговорност сменоводителот во чија смена рацијата пристигнала предоцна, после два часа – министерот Тошковски тогаш манипулативно, со етикети го изврти моето обраќање и се обиде да спинува дека ние цела полиција ја етикетираме дека е корумпирана” – потсети пратеничката Мојсоска.
„Левица уште месец-дена претходно, пред апсењето, алармираше дека агенцијата за обезбедување, „Рубикон” имала директни контакти со ВМРО-ДПМНЕ. Приведениот Нацев имаше слики од „Рубикон” на неговиот Фејсбук профил кој веднаш ги избриша. Премиерот велеше дека нема никаква поврзаност со агенцијата и ќе си даде оставка ако има било каква поврзаност. Има многу прашања кои институциите допрва треба да ги одговорат. Мора трагедијата да се расветли за никогаш повторно да не се случи” – истакна Мојсоска.
„Еден од изговорите на власта беше дека треба да има надзорна расправа не само за Кочани, туку и за „Беса транс” и за „Дурмо турс”, и апсолутно, пратениците од Левица ќе се потпишат и ќе поддржат таква надзорна расправа. Затоа што, на крајот на денот, ние говориме за изгубени човечки животи кои можеле да бидат спасени. Ниту еден политички пораз не може да е поголем од она што на нас ни е случи на 16 март” – заклучи пратеничката од редовите на Левица.
