Институтот за јавно здравје ги повика родителите да го проверат вакциналниот статус на своите деца и да ја надоместат пропуштената вакцинација против мали сипаници, рубеола и паротит. Апелот доаѓа поради недоволниот опфат со МРП вакцината во Македонија и регистрираните случаи на морбили во соседството.
Од Институтот нагласуваат дека вакцинацијата е најефикасната заштита од малите сипаници и нивното ширење. Особено е важно децата да ги примат двете дози според националниот календар за имунизација, а родителите кои не се сигурни дали вакцинацијата е комплетирана да се обратат во надлежниот вакцинален пункт. Навремената имунизација, посочуваат од ИЈЗ, ги штити и поединецот и целата заедница.
Во епидемиолошката проценка на Институтот се наведува дека и во Македонија се регистрирани лабораториски потврдени случаи на мали сипаници, додека во Косово и Бугарија има епидемии. Засега, според достапните податоци, нема основа да се заклучи дека во земјава постои пошироко епидемиско ширење, но ризикот од дополнителни случаи и локално пренесување е зголемен.
Морбилите се високо заразно вирусно заболување. Меѓу симптомите се висока температура, малаксаност, кашлица, течење на носот, црвенило на очите и осип кој обично започнува од лицето и се шири по телото.
При појава на вакви симптоми, препораката е лицето да остане дома и телефонски да се јави кај матичниот лекар, наместо без претходна најава да оди во чекална. Треба да се избегнува контакт особено со доенчиња, бремени жени, невакцинирани лица и лица со ослабен имунитет.
