Претседателот на синдикатот на Агенцијата за национална безбедност (АНБ) на Црна Гора, Драгољуб Миловиќ, е уапсен во Подгорица во рамките на голема полициска акција насочена кон истражување на финансиското работење на синдикалните организации во безбедносниот сектор.
Според досегашните информации, покрај Миловиќ, полицијата привела уште неколку лица, додека истражните активности се насочени кон можни финансиски неправилности во работењето на синдикатите поврзани со државните безбедносни институции.
Полициската истрага опфаќа повеќе институции, меѓу кои Министерството за внатрешни работи, Управата на полицијата, Агенцијата за национална безбедност и Полициската академија.
Меѓу приведените, според медиумските информации, е и Жарко Мрдовиќ, поранешен раководител на синдикалната организација на Полициската академија во Даниловград.
Истражителите го проверуваат финансиското работење на синдикалните организации, а се утврдува дали постоеле незаконски активности при располагањето со синдикалните средства.
Засега нема официјални информации за точниот број приведени лица, ниту за конкретните кривични дела за кои постојат сомнежи.
Од надлежните институции во Црна Гора се очекуваат дополнителни информации за резултатите од полициската операција и понатамошниот тек на истрагата.
