Министерството за внатрешни работи соопшти дека Република Северна Македонија активно учествувала во големата меѓународна оперативна акција Global Chain, спроведена во рамките на Европската мултидисциплинарна платформа за закани од криминал (EMPACT), насочена кон сузбивање на трговијата со луѓе, илегалната миграција и трудовата експлоатација.
Акцијата се одржала во периодот од 8 до 13 јуни 2026 година, а во неа учествувале 59 држави. Целта била откривање и разбивање на организирани криминални групи кои се занимаваат со сексуална експлоатација, трговија со деца, присилно питачење, трудова експлоатација и нелегална миграција.
Операцијата е предводена од Австрија, а како ко-лидери учествуваат Романија, Европол, Фронтекс, Интерпол и Америпол.
Во текот на заедничките акциски денови во Министерството за внатрешни работи бил воспоставен Заеднички координативен центар, во кој биле вклучени претставници од 40 држави. Размената на информации се одвивала во реално време преку безбедниот систем СИЕНА на Европол.
На територијата на Македонија, во рамките на акцијата, биле откриени три кривични дела „фалсификување исправа“, како и 49 прекршоци. Од нив, 42 прекршоци ги сториле странски државјани, меѓу кои 17 од Албанија, 16 од Турција, три од Србија, по двајца од Индија и Велика Британија и по еден државјанин од Косово и Бугарија. Дополнително, евидентирани се и седум прекршоци сторени од македонски државјани.
Според МВР, најчестиот прекршок бил „престој спротивно со наведената цел и причина“.
Во текот на контролите бил идентификуван и случај на нелегално посвојување, додека е покрената и истрага поврзана со трговија со луѓе преку присилно питачење.
На глобално ниво, резултатите од операцијата покажуваат дека биле уапсени 1.024 лица, од кои 334 за кривични дела поврзани со трговија со луѓе, а 690 за други кривични дела. Идентификувани се 2.070 жртви и потенцијални жртви, меѓу кои 1.908 возрасни и 162 малолетни лица.
Дополнително, идентификувани се 201 нов осомничен, отворени се 465 нови истраги, а откриени се и 80 случаи на употреба на фалсификувани документи, што ја потврдува размерот на меѓународната акција против организираниот криминал.
