Инцидент се случил утрово во близина на Белата куќа во Вашингтон, кога автомобил удрил во една од заштитните капии на претседателскиот комплекс, по што околните улици биле привремено затворени.
Според информациите на американските медиуми, возилото се забило во портата на раскрсницата меѓу авенијата „Конектикат“ и улицата „Ејч“, на северната страна од Белата куќа.
По инцидентот, возачот бил приведен од припадници на Тајната служба на САД, кои го задржале на испрашување за да ги утврдат околностите под кои дошло до судирот. Засега нема информации за повредени лица.
Надлежните служби веднаш го обезбедиле местото и презеле дополнителни безбедносни мерки, а сообраќајот во околината бил ограничен додека траела полициската интервенција.
Инцидентот се случува во период кога во САД е зголемено нивото на безбедносна тревога по серијата насилни настани во земјата.
Во текот на викендот, две лица за кои се сомнева дека се поврзани со Исламска држава фрлиле импровизирани експлозивни направи на протест во близина на официјалната резиденција на градоначалникот на Њујорк.
Само еден ден подоцна, по првите американски напади врз Иран, вооружен напаѓач отвори оган во бар во Остин, Тексас, при што загинаа три лица, а уште 15 беа ранети.
