Бубрежното заболување е познато како „тивок убиец“ бидејќи често нема очигледни рани симптоми. Се проценува дека до 90 проценти од луѓето не се целосно свесни дека имаат хронична бубрежна болест додека болеста не напредне.
Напредната бубрежна болест може да доведе до откажување на бубрезите, што бара дијализа или трансплантација на бубрег. Може да предизвика и други сериозни здравствени проблеми, вклучувајќи срцев или мозочен удар.
Д-р Јингдуан Јанг, основач и медицински директор на Јанг Институтот за интегративна медицина и кинески и западен лекар, за The Epoch Times вели дека неодамна имал неколку релативно млади пациенти кои веќе имале сериозни проблеми со бубрезите. Но, бидејќи чекаа премногу долго за да одат на лекар, нивните можности за третман беа ограничени. Доколку биле лекувани на време, можело да се спречи влошувањето на нивната бубрежна функција.
Д-р Јанг истакна дека некои рани симптоми на бубрежна болест можеби не се поврзани со бубрезите, туку всушност се предизвикани од намалената функција на бубрезите.
Тој наведе седум симптоми на кои треба да внимавате:
Гадење, повраќање и губење на апетит
Бубрежната инсуфициенција може да предизвика акумулација на токсини, метаболна ацидоза и нарушувања на електролитите во телото, што доведува до гастроинтестинални нарушувања и симптоми на гадење и повраќање, затоа внимавајте дека проблемите со варењето може да бидат поврзани со бубрезите.
Анемија и хроничен замор
Една од функциите на бубрезите е да синтетизира еритропоетин, хормон кој го стимулира производството на црвени крвни зрнца во коскената срцевина, како и да ги заштити кардиомиоцитите и да ја стимулира регенерацијата на кардиомиоцитите и крвните садови. Лошата функција на бубрезите може да доведе до анемија, што резултира со симптоми на хроничен замор.
Чешање на кожата
Кога бубрезите не функционираат правилно, токсините не се излачуваат правилно преку бубрезите, што може да доведе до чешање на кожата. Заболувањето на бубрезите може да предизвика и промени во нивото на одредени хормони во телото што може да доведе до чешање.
Ако имате чешање на кожата, „не одете само на дерматолог и не земајте лекови, туку размислете за можноста за откажување на бубрезите“, вели д-р Јанг. Чешањето на кожата може да биде предизвикано и од недостаток на витамин Б6 или цинк, како и од високо ниво на амонијак во крвта.
Промена во урината
Една од главните функции на бубрезите е производство на урина. Ако има проблем со бубрезите, урината може да стане заматена или пенста или да содржи крв. Дали пенливата урина е симптом на бубрежна болест?
Д-р Јанг вели дека е нормално повремено да имате меурчиња во урината. Сепак, протеинурија (присуство на вишок протеини во урината) може да укаже на оштетување на бубрезите и може да предизвика урината да стане како пена. Доколку секој пат има многу меурчиња во урината, а меурчињата не исчезнат по 30 секунди, доктор Јанг советува да се побара лекарска помош.
Ако урината има темна и жолта боја, може да содржи крвни зрнца, што значи дека има хематурија. Исто така, имајте предвид дека ако земате витамин Б комплекс, вашата урина може да стане жолта или црвена.
Акутна и хронична болка во долниот дел на грбот
Бубрезите се наоѓаат во долниот дел на грбот. Ако имаме силна болка во грбот, можеби ќе треба да утврдиме дали има проблем со бубрезите. Хроничната болка во долниот дел на грбот исто така треба да се сфати сериозно. Бубрежните заболувања може да предизвикаат хронична болка во долниот дел на грбот, односно од половината до задниот дел на нозете и глуждовите долж меридијанот на мочниот меур.
Метален мирис и вкус
Кога има проблем со функцијата на бубрезите, често ќе имаме метален вкус во устата. Во тешки случаи, ќе почувствуваме остар мирис на амонијак кога вдишуваме. Ова е предизвикано од високо ниво на уреа во крвта.
Висок крвен притисок кај помлади пациенти
Хипертензијата обично се јавува кај постарите лица. Ако некое помладо лице развие хипертензија, тоа може да биде поврзано со бубрежна болест.
Високиот крвен притисок предизвикува оштетување на еластичните влакна во ѕидовите на крвните садови. Ова дополнително ги оштетува малите крвни садови во бубрезите и ги спречува бубрезите да ја вршат својата функција на филтрација. Болеста на бубрезите може да доведе и до хормонална нерамнотежа, што го зголемува нивото на хормони кои го зголемуваат крвниот притисок.
