Над 700 полицајци ќе го обезбедуваат вечерашниот натпревар во Шпанија меѓу кошаркарската репрезентација на Валенсија и Макаби Тел Авив во Евролигата, поради стравувањата од инциденти во екот на конфликтот во Израел и Газа. Шпанските власти го прогласија дуелот за натпревар од висок ризик, ќе биде зголемено обезбедувањето и полициското присуство, а сите учесници и навивачи ќе бидат детално проверени.
„Поставивме глобална операција во која ќе работат повеќе од 700 припадници на полицијата, во униформи и во цивилна облека. Исто така, ги замолуваме навивачите да бидат потрпеливи, бидејќи овој пат потрагата ќе биде подетална“, се вели во соопштението на градските челници на Валенсија.
Натпреварот се игра вечерва од 20.30 часот во Валенсија.
Безбедноста е зголемена поради конфликтот во Израел и Газа, кој започна на 7 октомври со ненадеен напад врз Израел од страна на исламистичката палестинска организација Хамас.
Стравот од нови напади е зголемен и поради нападот што се случи во понеделникот вечерта во Брисел, за кој одговорност презеде Исламската држава, кога маж уби двајца навивачи на шведската фудбалска репрезентација, пред натпреварот со Белгија, во квалификациите за Европското првенство во 2024 година.
