Кошаркарите на Партизан се пласираа во финалето на АБА лигата откако во третиот решавачки натпревар од полуфиналето ја совладаа Цедевита Олимпија во Белград со 90:71 (24:16, 17:14, 24:23, 25:18).
Партизан за титулата во регионалното натпреварување ќе се бори со Црвена Звезда која во полуфиналето го елиминира Будуќност.
Пред нешто помалку од 15.000 навивачи во белградска Арена, црно-белиот тим го предводеше Зак Ледеј со 17 поени, а го следеа Џемес Нанели со 12 и Ален Смаилагиќ, Данте Егзум и Данило Анѓишиќ со по 11 поени.
Во редовите на Цедевита Олимпија најефикасен беше Зоран Драгиќ со 15 поени.
Партизан подобро влезе во натпреварот и со осум врзани поени на Смаилагиќ поведе со 8:2, а по четири минути игра стигна до големи плус 15 (17:2). Цедевита Олимпија одговори со две поврзани тројки на Драгиќ, Матковиќ следеше со осум поени, но црно-белите ја задржаа предноста и на првиот одмор заминаа со осум поени предност (24:16).
Гостинскиот тим подобро го отвори вториот дел, стигна до израмнување на половина од тој дел од играта (29:29), но избраниците на Жељко Обрадовиќ беа подобри во финишот и со серија од 11:1 дојдоа до предност од 11 поени на полувреме (41:30).
Партизан во вториот дел без поголеми проблеми одржуваше двоцифрена предност која во еден момент изнесуваше 28 поени.
Првиот натпревар од финалната серија е закажан за 12 јуни, а домаќин ќе биде Партизан.
