Германско село избра сириски бегалец за градоначалник со апсолутно мнозинство од 55,41 отсто, јави германската новинска агенција ДПА.
Ријан Алшебал, 29-годишен бегалец од Сирија, кој пристигна во Германија во 2015 година, се кандидираше на изборите во Остелсшајм во југозападната германска покраина Баден-Виртемберг како непартиски кандидат. Сепак, тој е член на партијата „Зелените“.
Алшебал го опиша своето искуство во кампањата како „главно позитивно“.
Тој го напуштил родниот град Суејда во јужна Сирија на 21-годишна возраст. Веќе седум години младиот Сириец работи во администрацијата на блиското градско собрание Алтенгштет.
Според Здружението на општини во Баден-Виртемберг, досега немало друг кандидат со сириско потекло за функцијата градоначалник.
