Никола Јокиќ потсети на своите најдобри постигнувајќи 47 поени во победата на Денвер над Атланта со 123: 115, што е негов личен рекорд во НБА.
Српскиот центар не направи ниту една грешка на натпреварот и со тоа стана само третиот на својата позиција во историјата што постигнал најмалку 45 поени без да изгуби топка. Другите двајца се Мозес Мелоун во 1987 година и Шекил О’Нил во 1994 година.
Новиот личен рекорд од 47 поени го украси и со 8 скока и по пет асистенции и блокади.Кај Атланта одличен беше Тре Јанг со 29 поени и 12 асистенции, но недоволно за да се избегне 29. пораз во сезоната.
Лука Дончиќ веќе ги навикна сите во НБА лигата на магични партии баскет, а таква имаше и ноќеска за Далас против Чикаго. Неговите Маверикс славеа со 118:110. Словенецот постигна 38 поени, комбинирани со 11 скока и 10 асистенции.
Дончиќ одигра вистинска симултанка во третиот период кога постигна 21 поен, а ова му е 11. трипл-дабл со што е лидер во досегашниот дел од сезоната. Кај Чикаго најдобар беше Лаури Марканен со 26 поени.
Уште еден играч од просторите на екс-Југославија одигра перфектен меч. Бојан Богдановиќ постигна 35 поени за Јута џез во победата од 128:126 против Њу Орлеанс пеликанс. Кај поразената екипа ист број на поени имаше Инграм, кој не успеа да го блокира Руди Гоберт при постигнувањето на победничките поени за Јута.
Резултати: Шарлот – Индијана 104:115, Орландо – Бруклин 101:89, Филаделфија – Оклахома 120:113, Вашингтон – Бостон 99:94, Атланта – Денвер 115:123, Њу Орлеанс – Јута 126:128, Далас – Чикаго 118:110, Сан Антонио – Милвоки 126:104, Сакраменто – Голден стејт 111:98.
