Поранешниот холивудски продуцент Харви Вајнштајн во понеделникот се изјасни за невин во судот во Њујорк по две нови обвиненија за сексуален напад.
Новото обвинение од обвинителот Џоан Илузи доаѓа во продолжение на петте обвиненија за силување и сексуален напад со кои поранешниот медиумски магнат веќе се соочува.
Откако ја слушна молбата, судијата Џејмс Бурк го праша Вајнштајн дали сака да оди на судење, на што тој одговори: „Не баш“. Бурк го одложи датумот за судењето од 9 септември за 6 јануари 2020 година.
Адвокатката на Вајнштајн, Дона Ротуна, ги отфрли дополнителните обвиненија како „очајни“.
„Ќе видиме што покажува новото обвинение наспроти она што го покажува поранешното обвинение, а потоа ќе поднесеме соодветни барања. Ќе поднесеме предлог за да го отфрлиме ова ново обвинение. И веруваме дека ќе успееме“, додаде таа.
Двете обвиненија се однесуваат на наводниот напад на две други жени во 2006 и 2013 година, но во новото обвинение се открива и дека ѕвездата на Сопранови, Анабела Скиора, која јавно го обвини Вајнштајн за сексуална напад врз неа во нејзиниот стан во Менхетен во 1993 година, ќе сведочи пред судот.
Обвинителите сакаат да го искористат нејзиното сведочење за да докажат дека продуцентот следел одредена шема при нападот врз жени.
Минатата недела адвокатите на Вајнштајн поднесоа предлог за промена на местото на настанот во апелациониот суд тврдејќи дека тој не може да добие фер судење во Њујорк поради интензивното медиумско внимание.
