Словенечкиот опозициски лидер, поранешниот премиер Јанез Јанша, оцени дека владината коалиција и премиерот Марјан Шарец не се снаоѓаат на европската политичка сцена, што се покажало и при „последната изнудена шпионска афера со Хрватска”.
Според него, аферата со прислушувањето е „пукање на Словенија во сопственото колено”, бидејќи Шарец свикал седница на Советот за национална безбедност во време кога Хрватска се подготвувала за успешна средба на 16 земји од Централна и Источна Европа со Кина, со која постигнала „неколку политички поени”.
– Забавно е кога гледаме комедија на сцена, но не и кога комедијата се случува во нашата Влада, вели Јанша, алудирајќи на Шарец, дипломиран актер, кој пред да влезе во политиката на јавноста и беше познат како стенд-ап комичар.
Јанша, исто така, рече дека односите меѓу Словенија и соседните земји се многу лоши, како и нејзиниот углед во меѓународната заедница.
– Никогаш откако постои Словенија односите со соседните земји не биле толку лоши, а угледот на државата е помал од кога било, оцени Јанша.
