По реакциите на социјалните мрежи на соопштението на партијата на починатиот експратеник Амди Бајрам, дека тој ќе биде погребан на Алејата на великаните, од АД Бутел за „Либертас“ појаснуваат дека информацијата е погрешна и дека Бајрам ќе биде погребан на муслиманска парцела веднаш зад еврејските гробишта во Бутел.
Поранешниот пратеник и политичар ќе биде погребан денеска, откако почина вчера на 64-годишна возраст.
Министерството за здравство вчера соопшти дека кај Амди Бајрам постмортем е утврдено дека бил позитивен на ковид-19. МЗ изрази сочувство до семејството и апелира, во интерес на заштита на нивното здравје, во целост да соработуваат со надлежните служби. Дополнително, да се избегнат сите погребни ритуали, а погребот да се спроведе согласно протоколите, како превенција од натамошно ширење на инфекцијата од ковид-19.
Синот на починатиот пратеник, Амди Бајрам, Габриел преку Фејсбук повика да се почитуваат мерките и на погребот на неговиот татко да се носат маски и да се одржува дистанца.