Skip to main content
Македонија

Судот му одреди 30 дена притвор на обвинетиот за нападот врз Сара, таа е пуштена на домашно лекување

17/11/2026  15:55

Триесет и едногодишниот охриѓанец обвинет за нападот врз својата 26-годишна партнерка Сара е спроведен во затворот во Охрид откако судот му определи 30-дневен притвор. Тој првично добил мерки на претпазливост, а Обвинителството побарало притвор откако при дополнителните проверки утврдило околности што укажувале на опасност од повторување на делото.

Основното јавно обвинителство Охрид го товари за три кривични дела – телесна повреда, противправно лишување од слобода и загрозување на сигурноста. Според обвинението, при вршење семејно насилство тој противправно ја затворил партнерката, физички ја нападнал, ја повредил и ја загрозил нејзината сигурност.

Нападот се случил на 15 ноември, околу два часот по полноќ. Според МВР, расправијата започнала во домот и продолжила во автомобилот на обвинетиот. Во текот на постапката, Сара била испитана во присуство на претставници на социјалните служби, а било извршено и вештачење за видот и карактерот на нејзините повреди. Таа е испишана на домашно лекување од Специјалната болница за ортопедија и трауматологија „Св. Еразмо“. Според лекарите, нејзината здравствена состојба е добра.

Со првичните мерки, на обвинетиот му било забрането да и се приближува на Сара на помалку од 50 метри, му бил одземен пасошот и бил задолжен редовно да се јавува во судот. На 17 ноември Обвинителството појасни дека првичната пријава на МВР се однесувала на едно кривично дело. Дополнително собраните докази, според Обвинителството, дале основа да се поднесе обвинение за три дела. При процената на ризикот од повторување на делото особено значење имале околностите поврзани со загрозувањето на сигурноста.

Од Обвинителството појасниле и дека, доколку притвор бил побаран во првичната фаза на скратената постапка, мерката можела да трае најмногу осум дена. По поднесувањето на обвинението, судот определил притвор од 30 дена. Притворот е процесна мерка со која судот постапува по законски утврдените ризици, меѓу кои е и опасноста од повторување на делото.

Случајот предизвика и политички реакции. Форумот на жени на СДСМ повика на протест пред седиштето на МВР во Охрид под слоганот „Стоп за насилството врз жените и фемицидот“, обвинувајќи ги институциите за ненавремено постапување. Пратеничката Јованка Тренчевска побара политичка одговорност од министерот за внатрешни работи Панче Тошковски, оценувајќи дека потфрлиле превенцијата и полициското постапување. Од ВМРО-ДПМНЕ го осудија нападот и ја обвинија СДСМ дека го користи повикот за протест за политички поени.

Во одделна постапка, против таткото на Сара е поднесена кривична пријава за загрозување на сигурноста поради пријавени закани кон семејството на обвинетиот. И нему му се определени мерки на претпазливост.