Skip to main content
Македонија

Родителите во паника, пожарникарите влегле преку тераса во Струмица, девојчето го нашле во длабок сон

16/09/2026  22:54

Вистинска драма со среќен крај се одвивала вечерва на улицата „4 Јули“ во Струмица, откако загрижени родители побарале помош бидејќи нивната малолетна ќерка со часови не одговарала на телефонските повици, ниту ја отворала вратата од станот.

Бидејќи станот се наоѓал на четвртиот кат, пожарникарите употребиле авто-скала и се искачиле до терасата. Оттаму успеале да влезат во станот и да проверат што се случува со девојчето.

По часови неизвесност и загриженост, следувало огромно олеснување.

Пожарникарите го пронашле девојчето живо и здраво – таа спиела во длабок сон и воопшто не ги слушнала телефонските повици, ѕвонењето и обидите на родителите да стапат во контакт со неа.

Необичната интервенција, која започнала со страв дека можеби се случило нешто сериозно, завршила на најдобар можен начин.