Skip to main content
Свет

Повеќето жители на Хавана повторно имаат струја по два дена прекин

17/03/2025  10:07

Компанијата што ја снабдува Хавана со електрична енергија соопшти дека повеќето жители на кубанската престолнина повторно добиле струја по речиси два дена прекин.

Во функција се ставени и двете најголеми нафтени електрани на Куба – Фелтон и Антонио Гитерас, што претставува значаен чекор кон нормализирање на снабдувањето со електрична енергија низ целата земја.

Речиси 48 часа, Хавана, густо населен град и голем туристички центар, беше без електрична енергија, што ја парализираше трговијата и угостителските објекти, а улиците останаа во целосен мрак во вечерните и ноќните часови.

Проблемот беше предизвикан од дефект на трафостаница во петокот навечер, поради што околу 10 милиони жители низ Куба останаа без струја.

Кубанската влада за кризата го обвини 60-годишното американско трговско ембарго, кое, според властите, го отежнува снабдувањето со нафта од странство.