Центарот за управување со кризи (ЦУК) соопшти дека до 20:00 часот на 15 јуни 2026 година на територијата на Македонија биле регистрирани вкупно 13 пожари на отворен простор.
Според најновите информации, еден пожар сè уште е активен, еден е ставен под контрола, додека 11 пожари се целосно изгаснати благодарение на навремените интервенции на надлежните служби.
Во моментов активен е пожарот во општина Бутел, во реонот на Визбегово, каде што гори депонија.
Под контрола, пак, е ставен пожарот на градската депонија во општина Демир Хисар, каде што гори отпад.
Во текот на денот успешно се изгаснати пожари на повеќе локации низ државата, и тоа: кај Љуботенски пат во општина Бутел, на патот кон Страхојадица во општина Зелениково, кај селото Булачани во општина Гази Баба, кај селото Средно Коњаре во општина Петровец, во Бардовци во општина Карпош, кај селото Лениште во Прилеп, кај плажата Кадмо во Охрид, пред патарината во општина Градско, во населбата Насеље во Штип, на Слупчански пат во општина Липково и кај селото Псача во општина Ранковце.
Најголем дел од пожарите зафатиле ниска вегетација, додека на одредени локации гореле отпад, сува трева, трње, дрво и ѓубре.
Од ЦУК повторно апелираат до граѓаните да бидат максимално внимателни и да избегнуваат активности што можат да предизвикаат пожари, особено во период кога високите температури и сувата вегетација значително го зголемуваат ризикот од нивно избувнување.
