Многу родители се прашуваат дали е добро бебето да спие во нивна близина и кога е вистинското време да се навикне на сопствено креветче. Според препораките на Американската академија за педијатрија (ААП), бебињата треба да го делат просторот за спиење со родителите во текот на првите шест месеци од животот, но не и истиот кревет.
Експертите објаснуваат дека бебето најбезбедно спие во свое креветче поставено во истата соба со родителите. Ваквиот начин на спиење, според истражувањата, го намалува ризикот од синдромот на ненадејна смрт кај доенчињата.
Спиењето во ист кревет со родителите, пак, носи одредени ризици. Постојат можности бебето да се заглави меѓу душекот и рамката на креветот, да биде притиснато или да дојде до други опасни ситуации, поради што педијатрите не го препорачуваат.
По навршени шест месеци, кога бебето станува поактивно и поподвижно, се советува целосно да спие во сопствено креветче.
За безбеден сон, стручњаците препорачуваат бебето секогаш да се поставува да спие на грб, креветчето да биде без перници, ќебиња, играчки и други предмети, а температурата во просторијата да се одржува меѓу 20 и 22 Целзиусови степени.
Дополнително, користењето монитор за бебиња може да им помогне на родителите полесно да ја следат состојбата на своето дете во текот на ноќта.
