Печење, чешање и осип како да сте ја допреле копривата – ова се најчестите симптоми на алергија на сонце, термин што се користи за различни кожни реакции предизвикани од изложување на сончеви зраци. Дерматолозите објаснуваат дека најраспространета форма е полиморфната светлосна ерупција, која се јавува 24 до 48 часа по изложување, со појава на мали црвени осипи, плускавци и силно чешање, најчесто на рацете, лицето и деколтето.
Посериозен и побрз одговор на кожата е соларната уртикарија, која може да се појави за 15 до 30 минути со формирање на црвени отечени наслаги, придружени со чувство како убод од коприви. За разлика од полиморфната ерупција што трае со денови, уртикаријата се појавува и исчезнува во текот на истиот ден.
Алергијата на сонце може да биде поттикната од земање одредени лекови и суплементи или пак контакт со растенија и парфеми што ја зголемуваат чувствителноста на кожата на УВ зрачење. Таа најчесто се јавува по 30-тата година од животот и почесто кај жени.
Дерматолозите советуваат строга заштита од сонце – носење облека со долги ракави, користење креми со висок заштитен фактор (SPF 50 UVA+UVB) и избегнување директно изложување на сонце. При појава на осип, потребна е терапија со антихистаминици и креми со кортикостероиди, а во потешки случаи и системски лекови.
Секогаш е важно да се консултирате со лекар за да се утврди причината за алергијата и да се исклучи можноста за сериозни системски заболувања.
