Администрацијата на американскиот претседател Доналд Трамп, откако тој се врати во Белата куќа, укинала или замрзнала 177 милијарди долари федерални грантови, главно за здравствена заштита, исхрана, заштита на животната средина и помош при катастрофи.
Непрофитната организација „States United Democracy Center“ и „Grant Witness“ – група научници, истражувачи и адвокати кои документираат промени во финансирањето за време на мандатот на Трамп, објавија дека сите 50 федерални држави во САД биле на удар, како и Дистриктот Колумбија во кој се наоѓа главниот град на САД, Вашингтон.
Грантовите наменети за заштита на здравјето на мајките во Мичиген, образовните истражувања во Мисисипи и помошта за земјоделци во Ајова се покажаа како елиминирани, замрзнати или одложени.
Калифорнија, Тексас, Њујорк, Илиноис и Северна Каролина имаа најголеми загуби на средства од грантови, што секојдневно се следи од веб-страницата Lost Funds. Според веб-страницата, повеќе од 20.000 локални самоуправи, училишни администрации, деловни здруженија и други тела кои претходно добиваа федерални грантови изгубија пари.
Според двете групи, 177-те милијарди долари претставуваат речиси 10% од дискреционите трошоци на федералната влада, но тие велат дека замрзнувањето на грантовите оди подалеку од вообичаените намалувања кога се менува федералната администрација.
„Тоа има огромен обем и огромно влијание врз луѓето и покажува кои држави се нападнати затоа што се на првата линија на одбрана на своите граѓани“, рече Кели Радер, директорка за истражување во States United Democracy Center.
Во некои случаи, судовите ги поништуваат одлуките на администрацијата.
