Кандидатот за германски канцелар на сојузните парламентарни избори на 23 февруари и лидер на германската централно-десничарска Христијанско-демократска унија (ЦДУ), Фридрих Мерц, синоќа, во интервју за јавниот сервис АРД категорично ја отфрли секоја соработка со екстремно десничарската Алтернатива за Германија (AfD).
-Дозволете ми овде да повторам за записник. Под мое водство нема да има соработка меѓу АфД и ЦДУ во Германија, рече Мерц. „Причините се јасни и очигледни“, додаде тој.
-Нема да соработуваме со партија која е ксенофобична, која е антисемитска, која има десничарски екстремисти во своите редови, која има криминалци во своите редови, партија која флертува со Русија и сака да ги напушти НАТО и Европската унија, рече лидерот на ЦДУ.
Германската разузнавачка служба, Канцеларијата за заштита на Уставот, ја третира АфД како десничарска екстремистичка организација.
Споменувањето од Мерц на криминалци во АфД може да биде насочено кон лидерот на партијата во покраината Тирингија, Бјорн Хоке, екстремно десничарски поттикнувач кој е добро познат во земјата по своите контроверзни изјави. Тој беше осудуван двапати на суд за свесно користење на забранета нацистичка парола во говорите.
Мерц рече дека секој чекор во насока на соработка со АфД би значел дека „ја продаваме душата на ЦДУ“.
На прашањето дали може да го исполни тоа ветување, Мерц одговори: „Да, ќе го исполнам. Со овој одговор ја врзувам мојата судбина како претседател на партијата ЦДУ“.
Фридрих Мерц е фаворит за германски канцелар на националните избори на 23 февруари, по распадот на трипартиската коалиција предводена од Олаф Шолц.
