
Шеесет и седумгодишна жена од кривопаланечкото село Дрење пријавила дека три лица физички ја нападнале по расправија за штетата што ја правеле крави во селото. Во Здравствениот дом во Крива Паланка ѝ биле констатирани тешки телесни повреди.
Според МВР, Д.Д. го пријавила случајот на 21 ноември во 9 часот во ОВР Крива Паланка. Во пријавата навела дека нападот се случил во Дрење и посочила три лица. Според „Слободен печат“, станува збор за членови на семејството кое порано ги поседувало говедата. Полицијата презема мерки за расчистување на случајот.
Истиот ден жителите го блокираа магистралниот пат, барајќи институциите да го решат долгогодишниот проблем со говедата што слободно се движат низ Крива Паланка и околните села. За состојбата расправаше и Советот на Општина Крива Паланка, а градоначалникот Сашко Митовски побара од Владата да прогласи кризна состојба во општината.


