МВР планира да ги опреми полициските возила со камери што ќе ја мерат брзината на другите возила додека патролата е во движење. Министерот за внатрешни работи Панче Тошковски најави и набавка на мобилни камери, со што контролата на брзината ќе се прошири и на делници каде што нема фиксни камери.
Според Тошковски, досегашните анализи покажале дека камерите поставени само на однапред утврдени локации нема да имаат доволен превентивен ефект. Затоа експертите предложиле опрема за мерење брзина да се вгради во постојните полициски возила. Целта, рече министерот, е возачите да знаат дека пречекорувањето на брзината може да биде регистрирано и на патишта каде што нема фиксна камера.
Мобилните камери, пак, ќе се поставуваат на таканаречените „црни точки“, односно на делници каде што често се случуваат сообраќајни несреќи со загинати или тешко повредени. Тошковски најави дека ќе се утврдуваат ризичните локации низ целата држава, од градските улици до магистралните и експресните патишта.
Говорејќи за критиките на проектот „Безбеден град“, министерот посочи дека во изминатите 15 години во сообраќајни несреќи во земјава загинале повеќе од 2.000 луѓе. Тој најави дека, покрај проширувањето на контролата со камери, ќе следуваат и други мерки за намалување на бројот на несреќи.
