Премиерот Димитар Ковачевски денеска изјави дека не е точно оти има пратеници од владејачкото мнозинство, односно од СДСМ, кои се против уставните измени. Според него, тоа што го кажува опозицијата нема реална основа. Процесот на устави измени, вели Ковачевски, не може да биде процес на уцени и на дневна политика, туку тоа треба да биде процес на широк, општествен и политички консензус.
ВМРО – ДПМНЕ мора да одлучи дали тоа што го зборува по амбасади, дајте ни власт, и безусловно ќе го промениме уставот, ќе го каже и пред народот, односно дали ги лажат амбасадите или го лажат народот. Прво тоа прашање мора да го одговорат, како раководство па потоа да можеме да продолжиме со дискусијата, рече Ковачевски.
Претседателот на СДСМ и премиер рече дека уставните измени се обврска за продолжување на европскиот пат на земјата и дека сите политички партии треба да покажат одговорност и додаде дека нема намера да свикува поединечни средби со пратеници или претседатели на партии.
-Лидерска средба кажав нема да има, свикана од мене, со оглед на тоа дека во овој момент нема потреба од такво нешто. Одвоени средби јас ниту сум практикувал, ниту практикувам, ниту ќе практикувам, рече Ковачевски.
