Сојузот на стопански комори (ССК) смета дека Владата ќе го најде најдоброто решение за превозниците во однос на визите за нивен престој во земјите од Шенген зоната. Засега, велат, се уште нема штети, но ситуацијата се следи со големи внимание.
Според Бизнис конфедерацијата на Македонија, за ова прашање требаше да се преговара уште на самиот почеток, кога беше донесена регулативата од страна на ЕУ.
-Ги следиме чекорите на Владата, бидејќи таа има најквалитетни информации и комуницира со претставниците на Европската Унија. Ние конкретно немаме сериозни информации во таа насока. Очекувам дека ќе се изнајде најквалитетно можно решение за да не трпат штета нашите превозници. Во моментов мислам дека нема штети, не знам точно кога ќе стартува тоа што е дефинирано од ЕУ. Ќе ни се случат повторно, сигурен сум, затворања на границите, камионџиите и логистичарите ќе ги затворат границите, бидејќи тоа е навистина тежок проблем. Ќе видиме како ќе се одвива тоа, изјави претседателот на ССКМ, Горан Ѓорѓиевски пред почетокот на тркалезна маса „Кон транспорт без хартија и без бариери – дигитален товарен лист и поефикасни граници“.
Миле Бошков од Бизнис конфедерацијата на Македонија истакна дека законот мора да се почитува.
-Им честитам и на МАКАМ-ТРАНС и на здружените асоцијации на транспортери низ регионот, меѓутоа законот мора да се почитува. Ние сме на некој начин во состојба дека мора да го почитуваме и дека ќе треба да се зголемуваат капацитетите на лиценцирани возачи кои ќе можат да престојуваат во рамки на дозволеното од 90 во 180. Нема излез и барањето е беспредметно, оцени Бошков.
На новинарско прашање за унгарскиот кредит, Ѓорѓиевски одговори дека тоа е позитивен исчекор за помош на приватните фирми.
-Повеќе пати сум спомнал дека унгарскиот кредит е позитивен исчекор за помош на приватните фирми. Не навлегувам во сегментот на општините и потребно е тоа повторно да го имаме како опција. Нашата главна забелешка тогаш беше дека е потребно средствата да бидат насочени кон микро, мали и средни компании, не кон големите компании и се сменија тие работи, рече претседателот на ССК.
