Skip to main content
Култура

47.ИФФК „Браќа Манаки” со импресивна програма со рекорден број гости, филмови и едукативни содржини

18/09/2026  14:11

Годинава имаме импресивна програма со рекорден број филмови и едукативни содржини. Морам да потенцирам дека имаме прекрасни автори и огромна бројка на гости на ова издание. Покрај лауреатите Ден Лаустсен и Џеф Кроненвет, во Битола доаѓаат Јануш Камински, Семи Капланоглу, Воли Фистер, Тимо Салминен и ред истакнати имиња од светската кинематографија, рече на денешната прес конференција директорот на ИФФК „Браќа Манаки”, Димитрија Доксевски.

Проекциите од главната селекција ќе се реализираат во Центарот за култура каде е обезбедено ново платно и нов проектор кој ќе се користи за потребите на Фестивалот и ќе го подобри квалитетот на проекциите со цел публиката да ужива во програмата на Фестивалот.

-Оваа година како Друштво на филмски работници започнуваме соработка со Европската филмска академија. Нивниот Cinematographers chapter се грижи за кинематограферите и нивната промоција. Заедно со Европската филмска академија започнуваме серија на панели на кои ќе разговараме за битни прашања поврзани за работата на кинематограферите, техничките услови во кои работат и ред други аспекти на нивната работа. Годинава, панелот ќе се одржи на 21 септември во рамките на фестивалот на кој ќе ни бидат гости Тимо Салминен и Јануш Камински, рече претседатеклата на ДФРМ, Марија Димитрова, која се заблагодари на директорот на фестивалот и на неговиот тим, Агенцијата за филм, генералниот спонзор А1 и останатите спонзори, како и Општината Битола без чија помош, како што подвлече Димитрова, не би можеле да го реализираме фестивалот 47 години.

Таа посочи дека и претставува голема радост што макпоинт програмата е повторно дел од фестивалската програма.

-Во неа имаме многу македонски филмови и сметам дека  тоа е мошне важно за македонската кинематографија и за да може нашата публика да ги види филмовите. Подготвени сме за утрешниот почеток на фестивалот и се надевам дека и вие и публиката ќе уживаме во сите содржини, рече Димитрова.

47. ИФФК „Браќа Манаки” се отвора утре во Центарот за култура во Битола со македонскиот филм „Скејтањето не е за девојчиња” во режија на Дина Дума.