Водата во струмичките села Рич, Попчево, Белотино и Вељуса се забранува за пиење, подготовка на храна и послужување во јавни објекти, соопштија попладнево од Општина Струмица.
Одлуката е донесена од Агенцијата за храна и ветеринарство (АХВ), по спроведен вонреден инспекциски надзор.
Според информациите објавени од Општината, при надзорот било утврдено отсуство на резидуален хлор, како и контаминација со бактерии кои се индикатори на фекално загадување.
„Решението е донесено од страна на АХВ врз основа на вонредниот инспекциски надзор, а при кој е констатирано отсуство на резидуален хлор и контаминација со бактерии – индикатори на фекално загадување“, соопштија од Општина Струмица.
Забраната не се однесува само на директно консумирање на водата. Таа не смее да се користи ниту за подготовка на храна, како и за послужување во јавни објекти во засегнатите населени места.
Од Општина Струмица апелираат жителите на Рич, Попчево, Белотино и Вељуса строго да се придржуваат до изречената забрана.
Мерката ќе остане во сила сè додека надлежните институции не утврдат дека водата повторно е исправна и безбедна за употреба.
