Бројот на рецепти за лекови за слабеење од групата GLP-1 во САД за деца под 12 години се зголемил за повеќе од 300 пати од 2019 година. Според истражување, лекарите затоа бараат нови и ефикасни начини за лекување на прекумерна тежина кај најмладите пациенти.
Студијата опфатила повеќе од 3,5 милиони деца со прекумерна тежина без дијабетес на возраст меѓу осум и 11 години, а податоците покажуваат дека уделот на рецепти за лекови GLP-1 скокнал од 0,03 проценти во 2019 година на 9,3 проценти до јуни оваа година
Иако тие лекови не се официјално одобрени за деца под 12 години, клиничките упатства во некои случаи дозволуваат нивна употреба за лекување на дебелина од осумгодишна возраст. Студијата покажа дека дури 94 проценти од децата на кои им биле препишани лекови GLP-1 имале тешка форма на дебелина. Покрај тоа, околу 65 проценти од нив имале барем една придружна болест, како што се висок холестерол, висок крвен притисок или апнеја при спиење.
Во текот на набљудуваниот период, вкупно 20.282 деца примиле лекови од групата GLP-1.
Студијата, објавена во списанието Pediatrics, исто така укажува на растечки нееднаквости во достапноста на третманот. Децата од побогатите заедници имале 55 проценти поголема веројатност да добијат рецепт за тие лекови.
„Лекарите и креаторите на здравствени политики имаат одговорност да обезбедат овие вредни, а понекогаш и скапи лекови да им бидат достапни на оние кои немаат приватно здравствено осигурување или не можат да си дозволат патувања во специјализирани педијатриски клиники“, рече Алан Маси, коавтор на студијата и вонреден професор по хирургија на Медицинскиот факултет Гросман на Универзитетот Њујорк.
Истражувачите ја користеа базата на податоци „Епик Космос“ за анализата. Тоа е национална база на податоци за електронски здравствени картони што содржи податоци за повеќе од 300 милиони пациенти во САД.
